Udaberriko Bestak antolatzen hasi da Euskara Batzordea. Aurten apirilaren 27 eta 28an, eta maiatzaren 1ean izanen dira. Horren harira, apirilaren 28an merkatua eginen da etxeko produktuekin (kontserbak, loreak, baratzeko puskak, postreak...) eta bigarren eskuko puskekin (jostailuak, liburuak, boltsoak, bitxiak...). Aurten, biltzen den diruarekin, herriko telefono gida berria eginen da, eta etxeen errotulazioa ere egin nahi da. Oraindik bi hilabete falta dira azokarako, baina herritarrei dei egin nahi zaie etxeko puskak merkaturako altxa ditzaten.
Maiatzaren 1ean Igantzi Kantari eguna eginen da, herriko karriketan. Horretarako, aitzinetik hainbat euskal kanta ikasteko aukera izanen da, martxoaren 1ean hasi eta ondoko ortziraletan. Entsaioak 22:00etan izanen dira, Erretorbaitan. Kantatzeko afizio pixko bat duen edozein herritarrek parte hartzen ahal du, eta ez da beharrezkoa musika jakitea.