Musutruk, laguntzeko helburu bakarrarekin, egiten duten lana eskertzeko Boluntarioen Eguna ospatu zuten otsailaren 18an Beran. Egun osoa batera igaro zuten Elkarrizan boluntario elkartekoek eta San Jose zahar etxeko adinekoek.
Boluntarioen eguna mahaiaren bueltan hasi zuten, guztiak elkartu zirenerako luntx ederra baitzuten zain. Tripa bete ondotik, besarkadak oparitu zituzten, urte osoan boluntarioek egiten duten lana eskertzeko asmoz. Arratsaldean 16:30ak aldera bertze luntx bat dastatu zuten, Errenteriko Roberto Alvarez eta Jose Ignacio Murua musikariek giroa alaitzen zuten bitartean. Batzuk eserita musikaz gozatzen, besteak gelditu gabe dantzan, ederki pasa zuten elkarrekin. Besta egiteaz gain, zahar etxeko eguneroko jarduerak ezagutu eta haietan parte hartzeko aukera izan zuten boluntarioek.
GAZTELERA KLASEAK IGANTZIN
Bolondres kontuekin segituz, Bortzirietako Gizarte zerbitzuen Mankomunitateak, herritarren eskariei erantzunez gaztelera ikastaroak antolatu ditu Igantzin. Astean bitan, astearte eta ortzegunetan, 16:30ean elkartuko dira Igantziko eskolan. Ekimena aitzinera daramate Elkarrizan taldearei esker. Maribel Abril Eraso eta Igantziko Udalaren eta eskolaren laguntza ere ezinbertzekoa izan da. Bortzirietan abian jartzen den laugarren alfabetizazio taldea da, Lesakan bat eta Beran bi baitaude dagoeneko.