Kultur Etxearen eta areto berrien izenak aukeratzeko prozesua jarri du abian berriki Lesakako Udalak. Herritarrek beraien proposamenak aurkeztu dituzte eta orain bozketaren txanda iritsi da. Igandean hasi ziren eta asteartera arteko epea izanen dute lesakarrek, gustokoen dituzten izenen alde egiteko. Astelehenean, udal bulegoetan eman dezakete botua 08:00etatik 14:30era. Asteartean berriz, turismo bulegoan 10:00etatik 14:00etara eta 16:00etatik 19:00etara. Asteazkenean, otsailaren 28an, kontaketa egin eta emaitzak argitaratuko dira.
Denera zortzi izen behar dira: Kultur etxearen eraikinarentzat, ekitaldi aretorako, erabilera anitzetako gelarako eta bost izen bertze bost geletarako. Pertsona izenak ezin ziren aurkeztu eta egiten ziren proposamenak arrazoitu egin behar ziren. Hori dela eta, Lesaka inguruko mendi eta parajeen izenak hartu dituzte askok oinarritzat, baina antzinako izenak, izaki mitologikoenak... ere aurki ditzakegu zerrendan. Intxisune, Arriondoa, Iturrieder... Proposamen guztiak ikusi nahi dituenak www.lesaka.net orrialdean aurkitu ditzake.