Kalean hainbeste mozorro ikusita, ez zuten lan erraza izanen Lesakako Zerbitzuen Elkartekoek. Aurten lehenengoz, mozorroa hobekien eramaten zuena saritzen zuten. Sari bakarra izatekoa zen hasieran, baina azkenean berdinketa gertatu eta bi sari banatu zituzten. Ongi merezitakoak biak, mozorroa azalean gelditu beharrean, barreneraino sartu eta ederki antzeztu baitzuten papera. Ijito ezkonberriak ziren Amaia Eneterreaga eta Martxel Rodrigez, moto lasterketako parte hartzaileak berriz Erretiradi peñakoak. Batzuk ijitoen dotoreziaz jantzita, familiako kide guztiak atzetik zituztela agertu ziren. Bertzeak berriz, Plaza Zaharra moto lasterketako zirkuito bihurtu zuten eta moto txikietan igota ikuskizun bikaina eskaini zuten. Lesakako Zerbitzuen Elkarteko Loli Antxordokik eman zizkieten sariak, Bereau hotelean zortzi lagunendako afaria eskuratu zuen talde bakoitzak.