Joseba Irazoki & Lagunak taldeak emanaldia eskaiko du urtarrilaren 25ean Berako Kultur Etxean, ortziral arratseko 22:00etatik aitzinera. Berako Kultur Batzordeak antolatutako kontzertura sartzeko 6 euro ordaindu beharko da.
Azken urteotan emanaldiak bakarka ematen ibili ondotik, Joseba Irazoki beratarra lagunekin batera ikusi eta entzuteko parada izanen da ortziral arratsean.
Banda dinamiko bat elkartuko du Berako musikariak: Felix Buff (Willis Drumond) bateria, Ager Insunza (Audience) gitarra-biolina, Jaime Nieto (We are standard) baxua, Iban Urizar (Andrakan, Cafe teatro...) tronpeta + zaratak, eta Igor Telletxea (Xabier Montoia, Petti...) tronboia + bateria… Sorpresak ere izanen dira.
Haurrentzako ipuin kontalaria
Egun berean, ortziral arratsaldeko 18:00etan Ixabel Millet haurrentzako ipuin kontalaria izanen da Berako Herri Liburutegian. 3 eta 5 urte bitarteko haurrei zuzendutako Galtzagorriak dantzan ipuina kontatuko du, Berako liburutegiak eta Berako Kultur Batzordeak antolatutako ekintzan.