Duela urte bete inguru hasi ziren Leire Telletxea (Bera, 1986) eta Negu txakurra txakurkrosa praktikatzen. Eskualdean oso ezaguna ez den arren, geroz eta hedatuagoa dagoen kirola da. Mushingaren modalitate bat da baina berezitasun batekin, lera tiraka eraman beharrean pertsona txakurrari segika korrika joaten baita, bien artean taldea sortuz. Leire eta Negu, GuHau taldean aritzen dira lasterka eta hasi berriak izan arren, Etxebarrin berriki jokatu den txakurkros lehiaketan bigarren postua eskuratu dute.
E. Iraola
Korrika egitea lehendik ere gustatzen zitzaionez, txakurraren bitartez ezagutatutako lagun batzuek animatu zuten Leire Telletxea txakurkrosa praktikatzera eta «hagitz gustora» dabiltzala dio. Pluralean hitz egiten du, bi baitira kirola praktikatzen dutenak; Alaskan Malamute arrazako Negu txakurra eta bera.
Txakurkrosaren helburua, «txakurraren arnesa soka batez gure gerrikora lotuta korrika egitea da, txakurra gure aitzinean tiratuz joaten delarik». Kirol honetan aritzeko txakurrak urte bat beteta eduki behar duela azaldu digu eta «Neguk urtea berriki bete duenez, hasi berriak gara». Lasterketetan oraintxe hasi dira «denboraldia azaro ingurutik martxo bukaerara» baitoa, baina, aurretik ere ari dira lanean. «GuHau taldean aritzen gara eta haiekin lehenagotik hasi ginen entrenatzen» erran digu.
Txakurra eta biak lasterka ibiltzeko entrenamendu bereziak behar direla dio «lasterketa hauek mendian izaten direnez, elkarrekin mendira korrika egitera joaten gara astean hiruzpalau aldiz». Lasterketak nahiko motzak izaten dira, 8 kilometro ingurukoak horregatik «tarteka serieren bat sartzen dute. Horretaz gain astean behin taldekoekin elkartu eta denak batera entrenatzen dugu».
Txakurra eta jabearen artean harreman estua behar dela aipatzen du «harreman ona behar da dudarik gabe, txakurra gogoz kontra, umore txarrez... eramaten baduzu kontrako emaitzak lortzen dira eta». Hala ere, taldekoekin entrenatzean edo lasterketak iristean txakurren erantzuna hobea izaten da «hainbertze txakur elkarrekin lasterka hastean txakurrak pila bat motibatzen dira eta behar bezala tiratzen dutenean korrikalariari aunitz arintzen zaio bere lana». Aldapa beheiti ordea, kontu handiarekin ibili behar da «txakurrak bere indar osoz tiratzen du eta pixkanaka poliki bezalako aginduak ematen ikasi behar da».
Hasiera «hagitz polita izan da». Hasieran gehien beldurtzen zuena «txakurrak lasterketetan nolako portaera izanen zuen zen». Izan ere, «tentsio momentuak bizitzen dira hainbertze elkartzen garenean». Lehenengo lasterketaren ondotik «gustora geratu nintzen».
Aunitz zabaltzen ari den kirola da «lasterketa eta txapelketa aunitz daude, Gipuzkoako Liga, Espainiako Kopa... Urrutira joan gabe lasterketak egiten dira Jaizkibelen, Oiartzunen, Errenteria...eta asteburu aunitzetan izaten ditugu».
Abenduan Etxebarrin lehenengo txakurkros lehiaketa antolatu zen, Leire eta Neguren lehenengo lasterketa ere bazen «zortzi kilometroko ibilbidea egin behar zen mendiz eta egia erran hagitz gustora gelditu ginen emaitzarekin». Gaineratzen du, aukera polita dela «zure afizio bera duten hainbertze pertsonekin egon ahal izatea».
Kirol honen alderdirik ederrena «mendia, korrika eta txakurrak gustatzen bazaizkizu aunitz disfrutatzen den kirola dela» da bere aburuz. Batez ere, «korrika bakarrik egitetik nahiko desberdina da txakur batek tiraka ematen duen sentsazioa».
Zailena berriz, «agian, maldan beheiti niri oraindik ematen didan beldur hori gainditzea. Lasterketa batzuk hagitz teknikoak dira eta horiek oraindik errespetu handia ematen didate» aitortzen du.
Leireren ustez, kirol hau gure eskualdean «nahiko ezezaguna da». Horregatik, gonbitea luzatu nahi izan du «jakin-mina dutenei probatzera animatuko nieke, merezi du eta.Txakurrak eta korrika egitea gustatzen bazaie txakurkrosaren munduan gauza aunitz daude ikusteko».
ERRENDIMENDUA
«Hainbertze txakur elkarrekin lasterka hastean txakurrak pila bat motibatzen dira eta behar bezala tiratzen dutenean korrikalariari aunitz arintzen zaio bere lana».
«Korrika bakarrik egitetik nahiko desberdina da txakur batek tiraka ematen duen sentsazioa».