Aste Kulturala ekitaldiz betea zegoen eta jendearen erantzuna ere bikaina izan da.
Ekitaldi guztietara jende andana agertu zen: Lesakako bandaren kontzertura 60 lagun bildu ziren; Xagu Taldearen antzezlanean ere 55 lagun irriz lehertu ziren taldearen 3 partaideek antzeztutako pasadizoekin; Zinean 50 haur sekulako abenturatan murgildu ziren, liburutegian irakurtzen eta interneten ere aritu ziren; Gazta Zati Bat dokumental itxaropentsua bertze 60 lagunek ikusi eta amestu zuten; Iñigo Saroberekin bertze hainbertzek turroiak egiten ikasi omen zuten ( beraz, aurten kasu ikasle hauen etxetan eginen dituzten esperimentuekin!); bizkotxo lehiaketan aurkeztutako 12 bizkotxoak dastaketan desagertu ziren; Guraso Elkarteak eskeini zuen txistorra eta hirugiharra jatean ere bertaratutakoek ederki berendu zuten, sagardo goxuaz lagunduta, noski, eta Biltokik antolatutako erakusketa herritarren erdiak baino gehiagok bisitatu zuen.
Eskertzekoa da horrelako ekitaldiak antolatzen aritzen direnei gure partaidetzarekin erantzutea, lan haundia egiten baitute debalde eta herria bizirik mantentzeagatik.
Gero, berriz Olentzeroa heldu zitzaigun: 21an eskolan azaldu zen haurren gozamenarako. 24an, goiz partean, haurrak eskean aritu ziren herrian barna eta arratsaldean berriz Olentzero lehiaketa egin zen.
Bien tartean, 22an elizan Dantza Taldeak 20. urteurrena ospatzeko emanaldi berezia izan zen arratsaldeko 8etatik aintzinera.
Saskiak eta loteriak ere barra-barra izan dira: eskolak, abesbatzak, dantza taldeak, Baratzondo elkarteak, ostatuak, dendak, denek Igantzikoak aberastu nahi dituzte! Ea norbaitek lortu duen!
Eromen hau pasatuta, bertze eromena: ospakizunak, afariak, bazkariak, parrandak, urte bukaera eta opila honen ginda modura, Erregeak, kabalgata, opari gehiago... Hainbertze ekintza, ospakizun eta bizipen gozagarrien tartean ez ditugu gurekin ez daudenak ahaztu behar, ezta gure bizimodu zoriontsu hau disfrutatu ezin dutenak. Norberak jakinen du nola lagundu egoera hauetan daudenei.