Eskolan baratze ekologikoa antolatzeko lehen pausuak eman dituzte. Egitasmo hau aitzinera eramateko, udaletxeak frontoi azpiko aldean lur eremu bat utzi dio eskolari eta lau irakaslez osaturiko lan taldea ere osatu da. Proiektu amankomun baten inguruan ikasgai ezberdinetako edukiak lantzeko baratzea toki egokia dela uste dute irakasleek . Baratze batean aitzinera eramaten diren hainbat jarduera eta haurrek izaten dituzten esperientziak, gela barruan ezin dira landu eta haurrek “eginez” ikasten dute irakasleen ustez, azken finean, ekintza parez pare dutelako. Irakaste-ikaste prozesuan oinarrizko gaitasunak lantzen direla uste dute. Bidenabar, herrian baratzea egiteko ohitura hau ez galtzeko ttikitatik hezi behar da eta bide beretik, ikasleen eta naturaren arteko harremanak sendotzen dira: biodibertsitatea, ekosistemak, oinarrizko ekologia… eta abar landuz.
Konposta, zuhaitz landareen mintegia eta metereologia gunea ere egiteko intentzioa dute.
Gurasoen laguntza ezinbertzekoa dutela adierazi digute eskolatik eta prest agertu omen dira lanerako. Berriki bilera bat deitu zuten honetaz solasteko.
Zerrakura egin, lurra moldatu, gorotza ekarri, tresneria gordetzeko etxola egin, ura ekartzeko modua aztertu, eta udan baratzearen jarraipena eginen dute.