Berako abesbatzarentzat urte berezia izan da aurtengoa. 25. urteurrena bete dute eta hori ospatzeko ekitaldi ugari egin dituzte urte guztian zehar. Abenduan ere, ez dira geldirik egonen. Bai etxean eta baita etxetik kanpo ere kontzertuak eskainiko baitituzte.
Abenduaren 2an, Donostiako udaletxean abestuko dute. Egun horretan Queimada kofradiaren eguna ospatzen da Gipuzkoako hiriburuan. Berako Abesbatza Ohorezko kofradea izanen da egun horretan. Kideen izendapen berriak egin aurretik eskainiko dute emanaldia Berakoek. Fatima Gonzalezen zuzendaritzapean bi abesti estreinatuko dituzte: 'Enguedellos (F.A. Rey Rivero)' eta 'El Cant dels Ocells (Pau Casals). Horiekin batera, Palkaren 'Alleluya' eta Benito Lertxundiren 'Baldorba' ezagunak ere interpretatuko dituzte.
Abenduaren 6an, Zugarramurdiko Sorginen Museoan arratsaldeko 19:00etatik aitzinera, Berako abesbatzaren emanaldiaz gozatzeko aukera izanen da. Donostian abestuko dituztenez gain bertze hauek ere interpretatuko dituzte: 'Binbili-bonbolo', 'Ilun-Abarra (Mocoroa)', 'Gaur Akelarren Gorbeian (Luis de Aramburu)', 'Chaparrita (Vivian Tabbush)', 'Maite (Behobide)', 'Iru Txito (Aita Donostia)', 'Baratze bat (Pier Paul Bertzaiz)' eta 'Mendirik Mendi (Salaberri)'.
Gabonetan, urteroko ohiturarekin segiz, San Jose egoitzan kontzertua eskainiko dute eta Eguberri egunean Berako San Esteban Parrokian, Meza Nagusian abestuko dute.