Bizikleta gainean hegan. Ia ia ezinezkoak diruditen salto eta akrobaziak eginez. Duela zazpi urte hasi zen Freestyle kirolean Martxel Arribillaga Indaburu, 19 urteko beratarra. Aurten hirugarren urtea egin du profesional bezala. Aurreko urteetan proba internazionaletan aritu zen eta Espainiako Txapelketa bi urtez jarraian irabazi du. Aurten lehenengoz mundu mailako txapelketa batean parte hartu du «FMB World Tour 2012an parte hartzera gonbidatu ninduten eta baietz esan nuen». Maila aldaketa nabarmena dela dio «munduko txirrindulari hoberenen aurka lehiatzea uste baino gogorragoa izan da». Lortu dituen emaitzekin gustura dago «uste nuena baino postu hobean geratu naiz eta heldu den urtean aurtengoa hobetzea espero dut».
Lehiaketa ugaritan parte hartu du aurten, eta Espainiako proba garrantzitsuena irabazi du duela aste batzuk, Madrilgo ‘Festibike’ lehiaketan erakustaldi bikaina egin ondotik. Lehiaketaren bezperako egunean ez zuen garaipenarekin amesten, zortea ez zuen bere alde «entrenamendu saioetan lurrera muturrez erori nintzen eta kolpea oso gogorra izan zen, ahoa lehertua nuen. Ez nuen uste gehiago saltatzen ahalko nuenik». Baina, aldez aurretik egindako lanak bere fruituak eman zituen «ez nengoen nire egoerarik hoberenean, baina aurretik entrenatzen pasatako ordu guztiengatik lehiaketa irabaztea lortu nuen». Horregatik dio «proba hau irabazi izanak garrantzia berezia du niretzat».
Denboraldi amaiera ez da erraza izan «hankeko lotailu-haustura izan nuen eta denboraldi amaierara iristea gogorra izan da». Etorkizunari begira, ez du bizikletatik jeisteko asmorik «hankari deskatsu bat emanen diot eta berriz forma onean nagoenean, heldu den denboraldirako prestatzen hasiko naiz».