Hasiera batean joan den igandean pizteko asmoa bazuten ere, eguraldi euritsua zela eta gibeleratu eta azkenean Lesakako Landazelaietan egin duten txondorra azaroaren 18an, igandean piztuko dute Arrano elkarteko kideek. Horretarako zenbait ekitaldi prestatu dituzte.
Honela, 12:30ean Olentzero, txistulariekin, Eskol-Ttikitik txondorrera joanen da. Txondor inguruan ere musika izanen da, baita bertsolariak eta txalaparta ere. 13:00etan Olentzerok txondorra piztuko du eta ondotik luntxa eskainiko da. Arratsaldean lehenengo “betarri” lana eginen da eta 17:00etan, txondorra nola mantentzen den ikusi nahi duenak agertu bertzerik ez du egin behar.
Hemendik aitzinera ere zaintze lanetan txandaka ariko da jendea, eta helburua, olentzero egunerako bertan egindako ikatza izatea da. Lesakako Arrano elkarteak, “Kabi bat, hamaika hegada” lelopean bere 25. Urteurrena ospatzeko egiten ari den ekitaldi ugarien artean azkenekoa da txondorrarena.