Azaroaren 1ean, Baserritarren egun paregabea atera zen. Herritarren eta bertakoak ez direnen aldetik, harrera izugarria izan zuen hamazazpigarren edizioak. Ekaitza elkarteak antolaturiko goiz pasa polita izan zen eta herriko plaza ingurua eta frontoia azoka bilakatu ziren. Bertakoen lana ikusgai izan zen bertze urte batez. Baserritarren eta herriko ekoizleen produktu, eskulan eta aziendak erakutsiz, 25 postu inguru izan ziren: barazkiak, frutak, gozokiak, zerrikiak, taloak, pintxoak, eskulanak… Herritarren parte hartze haundia izan zen eta herrian egiten dena ikusteko, probatzeko eta erosteko aukera izan zen. Frontoiaren sarreran, hamar bat ardi eta ahari buru ikusgai izan ziren Auzmantinkoborda eta Ximoneatik ekarriak.
Arantzako zortzigarren gazta lehiaketa ere izan zen eta hamabi gazta aurkeztu ziren. Berrikuntza gisa, aldi honetan, hiru sari eman ziren: Lehenengo saria, Tuanekobordako Marisol Almandozen ardi gasnak eraman zuen; bigarrena, Serorinbordako Margari Madariagak, eta hirugarrena, Gaxtelenkobordako Maddi Errandoneak.
Bertako produktuz hornituriko bi zare ere zozketatu ziren: Enkarna eta Tania Indakoetxea izaba ilobak eraman zituzten bi zareak.
Aurtengo edizioa pasatuta, hurrengo urterako zapore gozoarekin gelditu dira antolatzaileak. Zorionak beraz, Ekaitza elkarteari eta parte hartu duten herritar guziei.
Euskara Batzordeak antolaturiko kultur ekitaldiekin aintzinera segituz, azaroaren 2an, Mentxu eta Koldobike ipuin kontalariek haur eta guraso mordoxka bati lauzpabortz ipuin kontatu zizkieten baskulan. Ondoren, Herriko Etxeko gorapean txokolate beroa eta pastelak banatu zituzten guraso elkartekoek. Haurrek margotzeko mahaiak ere jarri ziren eta egonaldi polita izan zen. Biharamuneko filme emanaldian jende gutti bildu zen eta arratseko bertso afarian, hogeitamar afaltiar izan ziren elkartean eta Hodei Barrosok eta Sustrai Kolinak bertsotan afalondoa girotu zuten. Joan den astean, goizutarren txondorrari buruzko solasaldia eta bideo emanaldia; eta Nafarroaren konkistari buruzko hitzaldiak egitekoak ziren.