Bortzirietako solaslagunaren aurkezpena ortziralean, azaroaren 16an izanen da. Lesakan arratsaldeko 19:30ean, Bortzirietako Euskaltegiko Matxinbeltzenea Egoitzan, aurkezpen hitzaldia eta ondoren luntxa izanen da. Proiektuan parte hartu edo bertzerik gabe gehiago informatu nahi dutenei bertaratzeko deia egin diete antolatzaileek. Aurten Malerrekako Mankomunitateaz gain, Baztango Udala eta Bortzirietako Euskara Mankomunitatea ere egitasmoa bultzatzen ari dira. Proiektu honen helburua zonaldeko euskararen erabilerari bultzada bat ematea da. Horretarako, euskaraz solasteko zailtasunak dituztenak eta euskaraz ongi solasten direnak taldeka biltzen dira astean ordubetez. Parte-hartzea erabat debaldekoa da. Hau aitzinerat ateratzeko denen beharra dutela aipatzen dute antolatzaileek eta horregatik jendea egitasmoan parte hartzera animatu nahi dute, bai euskaldun zaharrak eta baita euskaldun berriak ere.