Aitzineko alean adierazten genuen moduan, urtero bezala, gainean ditugu udazkeneko kultur ekitaldiak. Herritar talde bat euskara batzordeak biltzen da eta hainbat ekitaldien artean, udazkeneko kulturaldia prestatzen ibili dira azken asteetan.
Ekaitza elkartearen eskutik, azaroaren 1ean, ortzegunean, Baserritarren eguna izanen da. Herriko plazan eta frontoian, herriko hainbat baserritar eta ekoizleek etxean eginiko produktu, azienda zein eskulan erakusgai edo salgai jarriko dituzte. Goiz polita pasatzeko modua izanen da oraingoan ere, hamazazpigarren urtez antolatu den tokiko azoka honetan. Zortzigarren gazta lehiaketa ere eginen da aurtengoan eta herrian egiten diren gazta onenak dastatzeko aukera izanen da.
Azaroaren 3an, larunbata, bi ekintza izanen dira. Batetik, arratsaldeko 06:00etan eta Baskulan, Urte berri on, Amona filme emanaldia izanen da. Arratsean berriz, Hodei Barroso eta Sustrai Colina bertsolariekin afaria izanen da Ekaitza elkartean.
Hurrengo asteburuaren atarian, azaroaren 6an, asteartea, 19:30ean Zahar Txokon, Goizuetako gazteek beren herriko txondorraren inguruko bideoa eta solasaldia eskainiko dituzte.
Azkenik, azaroaren 8an, ortzegunean, Nafarroaren konkistari buruzko bi hitzaldi emanen ditu Fermin Sanchez Aburuzak: 18:00etan haurrei zuzendutakoa izanen da eta 19:00etan, DBHtik aitzinera ikasten duten gazteentzat eta helduentzat izanen da. Solasaldiak irauten duten bitartean, haurrak zainduko dira.