Aurten ere, baserritarren eguna azaroaren 1ean izanen da. Ekaitza Elkarteak, ohi bezala, eguna prestatzeko gutuna bidali du etxez etxe, goizeko merkatuan herritarrak parte hartzera gonbidatuz. Azkenean, herritarren partehartzerik gabe zaila izanen baita azoka antolatzea.
17. edizio honetan ere, etxe nahiz baserrietan egin eta hazitako hainbat produktu, eskulan eta azienda erakustea nahi da elkartetik, funtsean hori baita egunaren helburua: bertan egiten dena plazan erakustea.
Goizean herriko plaza eta frontoian aziendak, barazkiak, fruituak, gozoakiak, opilak, zerrikiak, gaztak, artisau lanak… denetarik ikusgai eta salgai izaten dira. Zortzigarren ardi gazta lehiaketa ere eginen da aurtengoan.
Azokan nola lehiaketan parte hartu nahi duenak, aste hondarra baino lehen (urriak 25) horren berri elkarteko kideren bati eman behar dio: Maixe Fagoaga (617 296458) edo Aitor Telletxea (647 289778).
Baserritarren egunekoa Euskara Batzordeak antolatzen duen udazkeneko kulturaldian kokatzen da. Aurten azaroaren hasierako asteburuan izanen dira kultur egunak.