Atletismo eskolaren denboraldi berria abiatzeko prest dago Manttale taldea. Duela bi aste bilerak deitu zituen gurasoekin solasteko, eta aste honetan, atletismo eskola hasi du. Alde batetik, Manttale Ttiki taldean, 2001 eta 2006 urteen artean jaiotakoak sartuko dira eta bertzetik, gazteen taldean, 1997 eta 2000 urteen artean jaiotakoak.
Aitzineko urteetan bezala, Manttale Ttikin nahiz gazteen taldean hainbat jarduera eta entrenamendu egin nahi ditu Manttalek, lau monitorek gidatuta. Larunbat honetatik aitzinera, urriak 6, larunbatero-larunbatero bilduko dira ttikienak entrenatzera Berako kiroldegian, 10:00etatik 12:00etara. Gazteen taldearen kasuan, asteazkenean hastekoak ziren, urriaren 3an, hauek ere kiroldegian eta asteazkenero bilduko dira 17:30etik 19:00etara.
Azken urteetan, 60 neska-mutikok baino gehiagok parte hartu dute Manttale Ttikiko eskolan, atletismoaren oinarriak ikasiz eta joko didaktikoak eginez. Lau monitorek klase teorikoak eta praktikoak txandakatzen dituzte eta haurrek estiramentuak egiten, beroketak edo karrerako estilo eta teknikak ikasten dituzte. Asteroko entrenamenduekin batera, tarteka lasterketetan parte hartzen dute, baita mendira egiten diren txangoetan ere, oinez nahiz bizikletaz.