Bortzirietako Haur Besta lehenengo aldiz ospatuko da larunbatean Beran. Malerreka, Baztan eta Iparraldeko bizilagunak batzeko asmoz, Berako Labiaga Ikastolako Guraso Taldeak antolatu du jaia. Zonaldeko haurren eta gurasoen arteko harremanak bultzatu nahi dituzte eta horretarako, familia arteko egun dibertigarria antolatu dute.
Helburua ez da dirua ateratzea eta jendea animatzea nahi dutenez gurasoendako sarrera dohainik paratu dute. Haur bakoitzari hiru euro kobratuko zaizkie, eta familia ugaria baldin bada, sei euro.
Berako kiroldegia izanen da bestaren gunea. 10:00etatik 19:00etara puzgarriak, bideo kontsolak eta puzzle erraldoiak izanen dira, haur ttiki eta nerabeentzat bideratuta. Arratsaldeko lauretan, Irrien Lagunak-en eskutik, zirku tailerra izanen da. Bertan, malabareak, akrobaziak, kariokak, makil txinatarrak, globoflexia... irrien lagunen pertsonaiekin egiteko aukera izanen da. Antolatutako gunean, palomita eta talo postuak eta ostatua ere paratuko dituzte.