Liburuzainaren lanposturako Nafarroako Gobernuak hizkuntza perfilik ez eskatu izanagatik epaiketara jo zuen iaz Udalak. Epaiketako prozedurak euskaraz egiteko eskatu zuen, eta Nafarroako Justizia Auzitegiak uko egin ondotik, erabakia errekurritu zuen Udalak. Nafarroako Gobernuak ez zuen iritzirik eman, eta orain epaileak ebatzi du Udalaren eskariak ez duela lekurik. Epaileak ez dio erantzun Udalaren defentsak argudiatutako gaiei, eta Botere Judizialaren Legeak dioena baino ez du bildu. Horren arabera, gaztelania da epaitegietako hizkuntza. Erabakiak biltzen du gainerako hizkuntza ofizialak erabili ahal izanen direla bi aldeetako batek espreski ez erabiltzea eskatzen ez badu. Kasu honetan, Udalak espreski eskatu du erabiltzea, eta Gobernuak ez dio eskari horri erantzunik eman. Epaileak interpretatu du gaztelania erabiliko dela eta ez dagoela derrigortua euskara erabiltzera. Erabakia ezin da errekurritu. Udalak epailaren jarrera txarretsi eta justizian euskaraz aritzeko ezintasuna salatu du.