Abuztuaren 15ean burutu zen Frantziako Alpeetan Embrunman probaren 29. edizioa. Europako zaharrenetekoa eta Munduko gogorrenetakotzat hartua duten Ironman honetan 1.022 kirolari abiatu ziren, tartean Alejo Sarobe eta Bixente Igartzabal lesakarrak. Sarobek ez zuen proba bukatzea lortu, baina Igartzabalek Top-25ean sartu zen, 24. zehazki.
Aurtengoan bereziki gogorra izan da Embrunman, bero handia eta haize zakarra izan baitzuten. Horren erakusgarri, atera ziren 1.022 partehartzaileetatik 685 bakarrik helmugaratu zirela.
Igartzabal 24. izan zen, denera 11 ordu, 36 minutu eta 28 segundo lanean aritu ondotik. Eta hori igeriketako zatitik 701. postuan atera zela (01:17:13). Espero bezala, bere espezialidadea den bizikletan hobeki ibili zen, hamargarren izan zen zati horretan (06:21:52) eta oinezko lasterketa, maratoian, 44. denborarik onena egin zuen (03: 50: 26). Azkenean, beraz, bigarren urtez segidan 25 onenen artean sartzea lortu du Igartzabalek, lehenbiziko euskalduna izan zen eta estatuko kirolarien artean hirugarren izan zen, irabazle eta bigarren izan ziren Marcel Zamora eta Victor del Corral katalanen ondotik.