Osasun Zentroko auditoria jaso du berriki Udalak. Energia aurrezteko eta eraginkortasun energetikoa eta energia berriztagarriak kudeatzeko egin da azterketa eta paretak, sabaia, zoruak, leihoak, zirrikituak eta fakturak begiratu dituzte.
Egindako ikerketaren arabera, urtean 5.343 euro gastatzen dira eta 17,82 tona CO2 isuri. Gasa bereziki neguan eta argia urte osoan gastatzen dela kontuan hartuz, argiaren kontsumoa %61ekoa da eta gasarena %39koa. Paretak ongi isolatuak daudela ikusi da eta galtzen den energiaren %47 leihoetatik joaten omen da eta zorutik %27.
Egoeraren aitzinean, leihoak aldatzea proposatu da eta hori egin bitartean zirrikituetan juntak hartzea. Gisa berean, argiteriaren kontratazioan eskaintzak begiratu eta potentzia guttitu nahi dira eta fluoreszentearen balastroak aldatzea ere proposatu da, baita gela batzuetan zenbait lanpara kentzea ere. Ur beroaren gastuari ere irtenbidea eman nahi zaio, gastu energetikoa sortu arren, ur beroa ez baita behar bezala ailegatzen.
Erabilerari dagokionean, entxufe gorriak behar bezala erabiltzea planteatu da eta hutsik dauden geletan argiak itzaltzeko kontzientzia sortzea, edo bakarrik itzaltzeko sistemak paratzea.