Aurtengo Sanmigelak prestatzen hasia da Kultura Batzordea. Dagoeneko bilera batzuk egin ditu eta programaren lehen zirriborroa egina da. Uztailaren 17an, asteartea, 19:30ean Herriko Etxean eginen den bilera irekian zehaztasun guztiak azalduko dira eta behin betiko programa bertaratukoen artean diseinatuko da.
Aurten gainera, betizuen kontua solastu beharra dago, Nafarroako Gobernuak ateratako lege berriaren arabera, ekintza honetarako dagoen itxitura aldatu beharko litzatekeelako eta diru dezente denez, zalantzakoa da aurten betizuak izatea. Dena den, honen inguruko erabakia aipatutako bilera irekian erabakiko denez, jendea animatzeko deia egin du Kultura Batzordeak, «horrela guztion iritzia kontutan hartu ahal izateko. Edozein ideia dela ere, ongietorria izanen da eta ekintza berriren bat bururatuz gero, zalantzarik ez izan eta bilerara agertu!».