Eskolako denboraldia pasatuta, orain oporretan daude gaztetxoak. Horrela, irailera bitarte, bi hilabete pasatxoko atsedenaldian izanen dira. Mugimendua nabarituko da inguruetan, gaztetxoak dauden bazterrak nabarmenak baitira. Aurten ere, bertze urte batez, Bortzirietako Euskara Mankomunitatea eta Dindaia Fundazioaren eskutik udaleku irekiak izanen dira uztaileko hilabetean.
Aisialdirako tartea, euskara mingainean dutela, uztailaren 2an hasiko dute eta hamahiru neska-mutikok goizetako entretenimendua izanen dute. Ttikixeagoak edo kozkorxeagoak izan, denentzako izanen da zer egin. Itxaro Etxague arduradun gisa eta Ana Isabel Telletxea begirale bezala, biak herrikoak, gaztetxoen taldearekin ariko dira.