Espainiako Gerrak eta Frankismoak Beran eragindako kalteak eta biktimak aintzat hartuta, memoria historikoari zor, errepresioa jasan zutenei omenaldia eskainiko die aurten Udalak. Aralar, Bildu eta EAJren aldeko botoekin eta UPNren abstentzioarekin hartu zuen erabakia ekainaren 12ko batzarrean. 1948ko urtarrilaren 8an Udaleko Osoko Bilkurak Franco Espainiako diktadorea herriko seme kuttun eta adopziozko izendatu zuen erabakia baliorik gabe ere utzi du Udalak, eta ondorioz, izendapen hori kenduko du, aldi berean, Francok eta bere erregimenak ordezkatzen dutena gaitzetsiz.
Udalak nabarmendu du 1936ko abuztuaren 2an Bera bonbardatu zutela Francoren aldekoek eta gerran hildako herritarrez gain, sei beratar fusilatu eta bertze lau desagertu zituztela Francoren indarrek: Francisco Arozamena Irazoki, Lucio Aldai Longarai, Faustino Martinez Urteaga, Cesareo Seminario Iraizoz, Juan Etxenike Matxiarena eta Ecequiel Gomez Rodrigo izan ziren fusilatuak eta Santiago Anadon Cambero, Ramon Balza Loperena, Enrique Berasain Sorondo eta Jose Larraburu Maritxalar desagertuak.
Donostiako Ondarretako kartzelatik preso ekarri eta Berako harrobian fusilatu ondotik Berako hilerrian 130 lagun lurperatu zituztela uste da eta horregatik, hilerriko hobi komuna zabaldu dezatela eskatuko diote Aranzadi Zientzia Elkarteari. Herrian gelditzen diren ikur frankistak berehala kentzeko konpromisoa ere hartu du Udalak.