Ez da triatloi probetan parte hartzen duten lehenbiziko aldia Lesakako Beti Gazteko Bixente Igartzabal eta Alejo Saroberentzat baina parte hartu duten azkenean ere fin moldatzen direla erakutsi dute.
Maiatzaren 12an Madrilgo Buitrago de Lozoya herrian II. Ecotrimad proba jokatu zen, Espainiako distantzia ertain eta luzeko Triatloi txapelketarako sailkatzeko eta estatuko rankingerako puntuagarria zen proba. Han parte hartu zuten lesakarrek.
Distantzia ertaineko formatuan (1,9 kilometro igerian, 75 kilometro bizikletan eta 21 kilometro lasterka) ia mila triatletek hartu zuten parte. Horien artean, CN Sabadell taldeko Miquel Blanchart izan zen garaile gizonezkoen artean (03:54:42) eta Saltoki Trikideak taldeko Estefania Gomez emakumezkoen artean (04:26:06). Lesakarrei dagokienez, Bixente Igartzabalek 56. postua eskuratu zuen (04:41:56) eta Alejo Sarobe 311. izan zen (05:37:56).