Norbere etxean irabaztea ez da beti erraza izaten baina horixe lortu du Berako saskibaloi talde nagusiak. Toki Ona Bortziriak saskibaloi taldeak antolatu zuen Nafarroako lehen mailako lauko finala maiatzaren 20 eta 21eko asteburuan Beran eta liga irabaztea lortu zuen. Larunbatarekin finalerdiak jokatu ziren eta igandeko final estuan 70-67 irabazi zion Nafarroako Unibertsitatea taldeari. Berako taldea gibeletik ibili zen zatirik haundienean eta hirugarren laurdenean bazirudien Iruñera joanen zela liga. Azken laurdenean, ordea, markagailuari buelta eman eta irabaztea lortu zuen Toki Ona Bortziriak taldeak. Hirugarren posturako lehian, Berriozar nagusitu zitzaion San Adriani.
Baina ez da Toki Ona Bortziriak taldearen denboraldiko garaipen bakarra. Izan ere, kadeteen mailako neskek ere liga irabaztea lortu dute eta kadeteen kategoriako mutilak eta infantilen mailako neskak bigarren sailkatu dira ligan.