Ekainaren 8an Zintronikora ateraldia antolatu du Lesakako San Fermin erretiratuen elkarteak. Izen ematea maiatzaren 21etik 31ra zabalik izanen da eta autobusa bete arte hartzen ahal dira txartelak, 30 euroren truke.
Ekainaren 8an, goizeko 07:30ean abiatuko da autobusa Plaza Zaharretik eta bidean gosaldu ondotik, Korella eta Zintroniko bixitatuko dituzte eta gero Kadereitan bazkalduko dute. Herri hau ikusi ondotik, bueltatuko dira.
Erriberarako bidaiaz gain, ekain hasieran hainbat ekitaldi antolatu ditu erretiratuen elkarteak. Kartei dagokienez, mus txapelketa ekainaren 4an, seien txapelketa ekainaren 5ean eta despiste txapelketa ekainaren 6an jokatuko dira eta toka, igela eta bolo txapelketak ekainaren 7an, denak 18:00etan hasita egoitzan. Txapelketak jokatu ondotik, luntxa eskainiko zaie parte hartzen duten bazkide guziei.
Mendi taldeak, berriz, ekainaren 24an San Juan Xarrera ateraldia antolatu du. Oinez joanen direnak 09:00etan abiatuko dira egoitzatik eta ohiko lekuan hartuko dute hameketakoa. Autobusez, berriz, 11:00etan abiatuko dira, San Juan Xarreko mezara joateko eta Arantzako Burladan bazkalduko dute. Txartelak ekainaren 16a baino lehen hartu behar dira, 28 euroren truke.