Lourdes Goikoetxea Nafarroako Gobernuko Landa Garapen, Industria, Enplegu eta Ingurumen Kontseilariak Savera, Parklex, Martiko eta Ubidea enpresak bisitatu zituen maiatzaren 18an, azken urteotan 23 milioitik gora inbertitu baitituzte instalazio berrietan edo produktu berrien ikerketa eta garapenean. Eta horren atzinean, erabilera alderdikoia salatu du Udalak. Udalak ez zuen bisita horren berri, ez zitzaion ofizialki komunikatu ez gonbidatu ere, eta aldiz, UPNk duen zinegotzi bakarra bertan zegoela ikusi zuten komunikabideetan eta Gobernuaren webgunean. Jarrera hori deitoratu, eta «kargu publikoa alderdiaren propaganda egiteko erabili izana» salatu du Tokiko Gobernu Batzordeak.