«Harriduraz hartu dugu azkeneko TTIPI-TTAPAn Ezker Abertzaleak Udalari Babes Ofizialeko Etxebizitzak zertan diren galdetu izana. Harriturik edukiagatik, eta harriturik formagatik». Halaxe erantzun diote Ezker Abertzaleari Marisol Taberna alkateak sinatutako idatzi baten bidez. Alkateak dioenez, «batetik, udalbatza talde guztiek osatzen dugulako, eta Hirigintza Batzordean zein Gobernu Batzordean ordezkaritza dugulako hiru taldek: Bildu, Aralar eta EAJk. Bi batzorde horietan lantzen ari gara hirigintza arloan jorratu beharreko aldaketak». Batean zein bertzean azken urtean ez dela «liskarrik eta eztabaida gordinik» izan gaineratu du Tabernak, «eta kontsentsuzko bidea nagusitu dela bileretan». Hala, «denek proposamenak egiteko aukera izanda ere, harrigarria egiten zaigu, orain arte agertu ez diren kezkak komunikabideen bidez egitea».
Agerra eta Kaxerna inguruak hartzen dituen S12 eremuaren aldaketa orain dela urtebete inguru eten zenean, «merkataritzaren inguruko azterketa egin arte aldaketarik ez egitea erabaki zela» oroitarazi du oharrean. Prozesu hori urtarrilean eta otsailean egin zen, eta alkateak azaldu duenez, «herritar orok izan du aukera bertan parte hartzeko, eta 34 herritarrek eman dute iritzia, tartean dendariak, bezeroak eta hautetsiak aritu gara, baita Bilduko bi zinegotzi ere». Azken hauen inguruan erran du, «azkenaldian aditu dugu haien ahotik parte hartzeko prozesu honek ez duela balio, eta ausartu dira erratera herritarrek nahi dutena ez dela islatu prozesu horretan». Kritika horiei «Beran hainbertze jende inplikatu duen partehartze prozesurik ez dugula ezagutu» erranez erantzun dio alkateak. Bere hitzetan, jardunaldi horietan «argi gelditu da bertako dendak bultzatzea eta dinamizatzea dela landu beharreko estrategia, eta aberastasuna bertan sortzea».
Horrez gain, salatu du, «merkataritza azpiegitura handiak baztertzea planteatzen denean atera duela Ezker Abertzaleak etxebizitzaren eztabaida komunikabideetara». Suhiltzaileen inguruko S2 eremuaz, berriz, aipatu du, «lurjabe batek auzitara eraman duela Udala, eta hau argitu bitartean, ezin dugu aitzinera egin».
Bertzalde, S12 eremuarekin lanean dabiltzala bortz urte badirela adierazi du. «Azkeneko urtean egin dugun lana, merkataritza eredua, eta ondorioz, zein herri eredu nahi dugun hausnartzea, ez zaigu iruditzen denbora alferrik galtzea denik».
Azken 13 urteetan BOErik egin ez izana ezin zaiola egungo Udalari leporatu ere adierazi du alkateak, «urtebete eskas baitarama lanean, eta horretan Ezker Abertzaleak badu zer errana, bi agintalditan alkatetzan egon baita». Bukatzeko, jakinarazi du Hirigintza Batzordean konpromiso argia hartu dutela epe motzean S12 eremuaren ordenazioarekin bukatu eta betirako onartzeko».