Lourdes Goikoetxea Nafarroako Gobernuko Landa Garapen, Industria, Enplegu eta Ingurumen Kontseilariak joan zen ortzegunean Berara egindako bisitaz egin zuen erabilera alderdikoia salatu du Berako Udalak. Berako lau enpresa bisitatu zituen Kontseilariak, bere Departamentuak egindako inbertsioak gertutik ezagutzeko aitzakiarekin.
Udalak ez zuen bisita horren berri, ez zaiolakoz ofizialki komunikatu ez gonbidatu ere, eta aldiz, UPNk Beran duen zinegotzi bakarra bertan zegoela ikusi dute komunikabideetan eta Nafarroako Gobernuko webgunean. Jarrera hori deitoratu, eta «kargu publikoa alderdiaren propaganda egiteko erabili izana» salatu du Berako Udalaren Tokiko Gobernu Batzordeak.
Gobernu Batzordearen erranetan, «bertze behin, UPNk erakutsi du alderdi interesak lehenesten dituela herritarren eta interes orokorraren aitzinetik». Udalak salatu egiten du «denon diruarekin egindako inbertsioak modu zikoitz horretan erabili nahi izatea propaganda egiteko».
Berako Udalak uste du egokia eta gizabidezkoa dela Gobernuko kide batek herri batera bisita egiten duenean herriko alkatea edota Udalbatza gonbidatzea, herriko ordezkari gorena den neurrian, edozein alderditakoa dela ere. Halaber, prestutasun osoa agertu du Udalak lanerako asmoz, herritarren kezka eta arazoak aztertzera etorri nahi duen edozein Kontseilariri harrera egiteko.