Javier Prieto Martinez motor gidari beratarrak garaipena lortu zuen apirileko hondar asteburuan Alcañizko zirkuituan, Iparraldeko zonako puntuagarria zen proban, mila zentimetro kubikoko kategorian. Honela, hiru proben ondotik, lidergoa ere hartu du ezustean.
Iaz hasi zen Prieto motorren munduan, eta junior-amateur kategorian konpetitzen hasi zen, Asturiastik Kataluniarainoko pilotuak hartzen dituen Iparraldeko zonako txapelketan. Nafarroako Urantzian (Los Arcos) eta Motorland-Alcañizen jokatzen dira lasterketak. Joan den urteko emaitzak harrigarriak izan ziren, aldi guztietan podiumera igotzea lortu baitzuen, hiru aldiz bigarren eta bitan hirugarren sailkatuz. Gisa honetara, lehenbiziko proban parte hartzerik izan ez bazuen ere, meritu handiko hirugarren postuan bukatu zuen.
Aurtengo txapelketa serioago hartu du eta maila handiagoko pilotoen aurka ari da mila ccko kategorian. Denboraldi honetan hiru lasterketan hartu du parte: Albaceten bigarren izan zen, hirugarren Los Arcosen eta Alcañizen lehenbizikoa. Kategoriako liderra da orain.