Beran egiten duen lana Lesakan ere egiteko asmoarekin apirilaren 17an jendaurrean aurkeztu zuten Elkarrizan boluntarioen taldea Lesakako Andra Mari Zahar Etxean.
Alfonso Obeso aspaldian ari da boluntariotzan lanean Lesakan eta Elkarrizanen baitan eginen dira lan horiek hemendik aitzinera. Obesorekin batera, Maria Isabel Zugarramurdi, Ladislav Covaric, Margarita Susperregi, Maria Gago eta Jose Mari Irazoki izan ziren aurkezpenean, baita Marian Biurrarena Elkarrizan taldeko ordezkaria eta Jokin Apezetxea Bortzirietako Oinarrizko Gizarte Zerbitzuetako teknikaria ere.
Aurkezpenarekin, zahar etxeko bizilagunek aurpegia jarri zioten boluntario lanean ari direnei eta horretaz gain, Elkarrizanek eskaintzen duen zerbitzuaren eta bere funtzionamenduaren berri izan zuten. Elkarrizan elkarteak laguntza lanak egiten ditu, zahar etxean bertan edo paseatzerako orduan, mahai jolasetan, mandatu ttikiak egiteko, medikura joateko edota txangoak egiteko eta ez ditu ordainduak diren bertze lan batzuk ordezkatu nahi. «Zahar Etxean daudenen bizi-kalitatea hobetzera bideratutako zerbitzu osagarriak eskaintzea da helburua», adierazi zuten aurkezpenean. Behin aurkezpena eginda, eskaera-orri bat utzi zuten Elkarrizan elkartekoek, zahar etxeko bizilagunek, senideek edo zuzendaritzak betetzeko eta nahi diren laguntza motak zehazteko.
Elkarrizan elkartearen bertze helburuetako bat aisialdirako ekitaldiak (kultura, musika…) zahar etxera hurbiltzea da. Honela, Emaitza antzerki taldearen borondateaz baliatuz, umorezko antzezlana eskaintzekoa zuten Lesakako zahar etxean.