Gazte Martxaren harira, Lesakako herri sarreran horren berri emateko herriko gazteek egindako murala, halabeharrez zuriz margotu behar izan dute. Halaxe jakinarazi du Lesakako Gazte Mugimenduak. Euren aldarria Jalgi Hadi Garaipenera zen eta helburua «pareta urdin eta gorri biziz apaintzea bertzerik ez genuen», baina gaineratu dutenez, «berde koloreko batzuei ez omen zitzaien sobera gustatu artelana eta beti bezala, zirikatzera etorri ziren». Margotzen ari ziren gazteetako bat identifikatu egin zuten. Hala ere, murala bukatu eta «hainbat astez herri sarrera apaintzen egon dela» adierazi du Gazte Mugimenduak, «gazte martxan parte hartzeko deialdia zabalduz». Baina duela gutti, identifikatutako gaztearen etxera Nafarroako Gobernuko gutuna iritsi da, eta Gazte Mugimendutik erran dutenez, «gutun horren arabera, guardia zibilak jarritako denuntzia batengatik, hamar eguneko epean murala xuriz margotzen ez bagenuen 1.500 eta 6.000 euro arteko isuna ordaindu behar genuen». Hori dela eta desagertu da murala: «isuna ez dugu ordaindu, baina berriro ere argi gelditu zaigu berde kolorekoen jokamoldea zein den: adierazpen askatasuna ukatzen segitzen dute». Horren aitzinean ez direla makurtuko azaldu dute gazteek, eta herriak bertze hainbat pareta dituela aprobetxatuz, larunbat honetan, hilak 5, bertze hitzordu bat egin dute: 09:30ean gelditu dira Lesakako Arranon, «bertze mural bat margotzeko gazte martxaren oroitzapen gisara». Arratsalde horretan Bilbon eginen den manifestaziora joateko deialdia ere luzatu dute eta gauean, Kattu ostatuan antolatu dituzten kontzertuetara hurbiltzeko gonbita ere egin dute. Azken mezu bat ere luzatu nahi izan dute: «adierazpen askatasunaren alde, margotu dezagun Euskal Herria kolore biziz eta jalgi gaitezen garaipenera».
Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.
Egin TTIPI-TTAPAren lagun