Seguru aurtengo Mendi Itzuliko kamiseta edo jertseren bat erosia izanen duzuela aunitzek. Hurbiltzen ari zaigu data. Duela bi urteko eguraldia enkargatzeko aukerarik balitz… Ekaitza Elkartea Mendi Itzulia antolatzen ari da eta aurten, maiatzaren 20an izanen da. Ibilbidean herriko mendietako tontorrak zeharkatzen dira: Unanu (659 metro), Itsaszelaia (517), Izu (828), Oilargata (660), Ibintza (1.037), Ekaitza (1.040), Illurdi (1.085), Mendaur (1.136, aukerakoa), Mairubaratza (750) eta Zepuru (715).
Ibilbidearen distantzia 30 bat kilometrokoa da eta 1.740 metroko desnibela du. Irteera eta helmuga herriko plazan da, bidea ongi seinalizatzen da eta ibilbidean hornidura eta osasun zerbitzuak eskaintzeko postuak paratzen dira. Parte hartze haundia izan da aitzineko edizioetan: 2003an 232 pertsona, 2004an 364, 2006an 418, 2008an 502 eta 2010ean 704 mendigoizale.
Hasieran aipatu bezala, kamisetak 12 eurotan eta jertseak 32 euroan salgai daude herriko ostatuetan. Informazio gehiagorako aldizkariko 51. orrialdean, www.menditzulia.com web orrialdean edo bi telefono hauetara deituta: 617 239 361/ 647 759 140.