Ez da erraza Euskal Herriko pailazorik ospetsuenekin ikuskizun bat antolatzea. Han eta hemen ibiltzen dira Pirritx, Porrotx eta Marimots eta data bat libre aurkitzeko zaila izaten da. Baina Pelle Ttiki Haur Eskolako hezitzaile eta gurasoak joan den urte bukaeratik harremanetan jarri ziren pailazoekin. Azkenean, apirilaren 21ean, hutsune bat zutela egutegian eta data horixe aukeratu eta lanean burubelarri hasi ziren ikuskizuna antolatzen. Herrian gisa honetako emanaldietarako azpiegitura egokirik ez dagoelako, Lesaka eta Berako udaletxeetako ateak jo zituzten eta Pelle Ttikikoen hitzetan, harrera arront ona izan zuten bietan. Baina bat aukeratu behar eta Beran egitea erabaki zuten.
Larunbatean Eztegara pilotalekuan izanen da ikuskizuna, 18:00etatik aitzinera. Mila sarrera salgai paratu dira 7 eurotan: Pabloenean, Beran (Errekalde), Lesakan (Atxaspi), Donezteben (Titi), Elizondon (Fantxike), Igantzin (La Villa), Etxalarren (Herriko), Sunbillan (kanpinean), Urdazubin (farmazia) eta Irunen (AEK). Honez gero, ttikituak izanen dira sarrera horiek.
Pelle Ttikik dituen gastuak arintzeko ekitaldi garrantzitsua izanen da. Momentuz, aurreikuspenen arabera, sekulako erantzuna izanen du.