Bi urtetik behin egiten den hitzordua dugu Arantzako mendi ibilaldia eta aurtengoa maiatzaren 20an izanen da. Euskal Herriko edozein txokotatik mendizale talde ederra etortzen da eta ingurukoek ere izugarrizko ohitura dute itzuli hau egiteko.
Mendi elkarteek edo taldeek mendi ibilaldien egutegia ikasturte hasieratik finkatzen dute. Herrikoa ere hortxe dago egutegian. Hasierako bi edizioak elkarren ondotik egin baldin baziren ere, 2003an eta 2004an, gero bi urtetik behin egitea erabaki zen. Itzulia tokatzen ez den urtean, Goizutarako ibilaldia antolatzen du elkarteak. Iaz, halaxe egin zen.
Ekaitza elkarteko mendiko batzordea burubelarri lanean ari da ekintza prestatzen eta mendian ibiltzea gustokoa duena ongietorria izanen da.
Junta aldaketa
Elkartetik atera gabe, martxoaren 16an batzorde aldaketa egin zen. Bi urte pasatu ondotik, arduradunak aldatu dira. Junta berrian honakoak daude: Gregorio Mitxelena, Juan Migel Almandoz, Belen Mutuberria, Asier Etxepeteleku, Xabier Zugarramurdi, Ixidoro Goia, Iñaki Alustiza, Joxe Ramon Amoros, Maixe Fagoaga, Aitor Telletxea, Luzia Iparragirre eta Xatur Larralde. Eta atera direnak Sonia Iturria, Elixabet Iturria, Aintzane Iturria, Jaione Irigoien, Gotzon Arenas, Martxelo Jorajuria, Ainhoa Alzuri eta Mikel Leiza dira.