Bortzirietako Eskuz Banakako XI. pilota txapelketako finalak martxoaren 10ean jokatu ziren Lesakan. Guztira 101 pilotari aritu dira lehiaketa honetan zortzi kategoritan banatuta. Bortz herrietako pilotariez gain, Txarutakoak, Hondarribikoak, Oiartzungoak eta Iruñerrikoak ere aritu dira.
Aurrebenjaminen edo ttikien mailan, Berako Gure Txokoako bi pilotari izan ziren aurrez aurre eta Andoni Telletxeak 18-14 irabazi zion Unai Lluciari.
Benjaminetan, B mailan ere Berara joan zen txapela. Gure Txokoako Jon Pagola nagusitu zitzaion Lesakako Arkupeko Imanol Ugaldebereri, 18-11. A mailan, Baztango Txarutako Axier Bailarenak 18-9 irabazi zion Gure Txokoako Asier Telletxeari.
Alebinetan, B mailan, Etxalarko Altxatako Aritz Irazoki eta Arkupeko Iker Iriarte aritu ziren nor baino nor. Nahiko berdinduak ibili arren, 18-16 nagusitu zen Etxalarkoa. A mailako finalak ere ikusmina piztu zuen, Igantziko Biltokiko Enaitz Telletxeak 18-6 irabazi zion eta Gure Txokoako Mikel Eltzaurdiari.
Infantilen A mailako finalean, Gure Txokoako Harri Maritorenak bere indarra eta eskuin kolpea nabarmendu zuen eta 18-9 irabazi zion Oiartzungo Oiarpeko Ekain Etxeberriari.
Kadeteen B mailan, Txarutako bi pilotari izan ziren aurrez aurre: Enaitz Antso oiztarra eta Iker Espelosin sunbildarra. Markagailuan gorabehera dexente izan zuen partidaren ondotik, azkenean, sunbildarra nagusitu zen, 15-18. A mailako finalak ere ikusmina piztu zuen. Gure Txokoako Ander Errandonea 18-7 nagusitu zitzaion Arkupeko Jon Olaizolari.
Finalak bukatuta, sariak eman zitzaizkien partehartzaileei eta txapelak eta kopak txapeldun eta finalistei. Sari banaketan, bortz herrietako pilota eskoletako irakasleekin batera, Ainara Flores eta Jose Emilio del Rio Lesakako zinegotziak eta Fernando Berasain Berako zinegotzia izan ziren.