Bortzirietako Egin dezagun Bidea ekimenak «lan tresna berri» honen aurkezpena egin zuen abenduaren 17an Lesakan. Talde berriaren erranetan, «garai berriak heldu dira, baina oraindik Euskal Preso Politikoei salbuespenez ezartzen zaien kartzela politika, errepresio eta erabilpen irizpideen arabera antolaturik dago». Horren adierazgarri dira, ekimenaren ustez, «20 urtetik gora dirauen sakabanaketa politika, bai eta azken hamarkadan gogortu diren muturreko neurriak ere».
Neurri hauek aipatu zituzten: «kondena osoa beterik edo gaixotasun larria izanik preso mantentzea, askatasun kondizionala desagertzea eta behin behineko askatasuna apenas aplikatzea, isolamendua, presoen aurkako xantaia etengabea, bakartzea, urruntzeak, lekualdatze erabat arbitrarioak, erasoak, jipoiak…».
Euskal presoei politika berezia eta ezberdindua aplikatzen zaiola gogoratu ondotik, desberdintze honen oinarriak «euskal presoen jatorri politikoa eta izaera kolektiboan» dagoela erran zuen ekimenak.
Gisa berean, kartzela politika errotik aldatu eta konponbide klabeetara igaro behar dela adierazi eta zera aldarrikatu zuten: «Eskubide guztiekin, Euskal Presoak Euskal Herrira; kondenaren hiru laurdenak bete dituzten presoak kalera, Iñaki kalera; bizi arteko doktrina indargabetu; gaixotasun larrian dauden presoak kalera eta isolamendu eta bakartzearekin amaitu».
Orain hasten den bidea «seguruena luzea» izanen dela iritzi zioten, «baina lehenbailehen presoak etxeratzen hasteko eta guztiak erabat aske izatera ailegatzeraino etenik izanen ez duena». Hor kokatzen da Bortzirietako Egin Dezagun bidea.
Bortzirietako instituzio, gizarte eragile, elkarte eta banakakoei auzolanean aritzeko gonbitea ere luzatu zieten eta lehenbiziko aukera urtarrilaren 7an Bilbon egitekoa zen mobiliziazioa zela azaldu zuten: «euskal preso eta iheslariak etxera ekartzeko, denon artean lortuko baitugu».