Berako merkataritzari buruzko gogoeta prozesu parte-hartzailea paratu nahi dute abian Berako Udalak eta Larun Haizpe merkatarien, ostalarien eta zerbitzu enpresen Elkarteak. Horretarako 30 herritarrez, 5 udal ordezkariz eta 15 dendariz osatutako lantaldeak eratuko dira.
Denetara, beraz, 50 beratarrek parte hartu ahal izanen dute prozesuan, Berako komertzioaren ahulguneak eta indarguneak zein diren, beratarren erosketa ohiturak eta nolako erosketa eremuak behar edo nahi dituzten aztertzeko.
Parte hartzeko izen ematea 012 telefonoan egin behar da urtarrilaren 5a baino lehen eta parte hartzaile kopurua mugatua denez, antolatzaileek konfirmatuko dute izen-ematea, apuntatutakoen artean aukeraketa eginen baita, auzo eta adin desberdinetako pertsonak egon daitezen prozesuan.
Hiru lan bilera
Prozesuko partaide izateak Beralandetan euskaraz eta gazteleraz eginen diren hiru lan bileratan parte hartzea eskatzen du. Lehenbizikoa urtarrilaren 16an eginen da, 19:30etik 21:30era, “Berako merkataritzaren etorkizuna. Zein da hemendik 10 urtera Berako merkataritzarentzat nahi dugun geroa?” izenburupean. Urtarrilaren 23an, “Zein da gaur egungo merkataritzaren egoera? Zein sendotasunak, ahultasunak, erronka nagusienak? Ze inertzia du?” galderei erantzuten saiatuko dira dendariak 14:30etik 16:30era eta gainerakoak 19:00etatik 21:00etara. Otsailaren 6an, 19:30etik 21:30era “Zein dira Berako merkataritzaren lehentasunak? Zein egitasmok behar dute bultzada nagusia?” galderei erantzun eta prozesuaren ondorioak lantzen saiatuko dira. Saio guziak dinamizatzeaz Prometea taldea arduratuko da.