Bortzirietako bertso eskolak hamahirugarren urtez antolatutako taldekako bertso txapelketa eginen da abenduaren 9an eta 10ean. Azkeneko urteetako egiturari eutsiz, 24 bertsolari ariko dira, zortzi hirukotetan banatuak.
Lehenbiziko bi kanporaketak abenduaren 9an, ortziral arratsean eginen dira Berako Espidobaita elkartean. 20:30ean afari-merendua eginen da eta gero, 22:30ean hasita eginen dira bi saioak. Lehenbiziko saioan, Beratarrak taldea (Julen Zelaieta, Patxi Castillo eta Aitor Elexpuru), Istorikuk taldearen kontra ariko da (Manolo Arozena, Egoitz Telletxea eta Iñigo Olaetxea “Makuko”). Bigarren saioan, Guaperasak taldea (Josu Sanjurjo, Mikel Telletxea "Tetxos" eta Iban Garro), Bordakuk taldearen kontra ariko da (Ioar Tainta eta Juan Mari eta Maialen Lopez aita-alabak).
Abenduaren 10ean, larunbat, arratsaldeko 14:00etan bazkaria eginen da Arrano elkartean eta bazkalondoan, 15:30eak aldera eginen den saioan, Eskolartekuk taldea (Xabier Silveira, Maddi Ane Txoperena eta Maialen Belarra), Malerrekako hirukotearen kontra ariko da. 17:00etan, berriz, Telebote ostatuan, Aurten bai! Taldea (Xabier Terreros, Jon Silveira eta Eneko Fernandez), Baztango lehiaketaren txapeldunaren kontra ariko dira.
Segidan bi finalerdiak jokatuko dira. Haizegoa ostatuan, 18:30ean Espidobaitako lehen saioko irabazlea Arranoko saioaren irabazlearen kontra ariko da eta Atxaspin, 20:00etan hasiko den bigarren finalerdian, Espidobaitako bigarren saioko irabazlea eta Telebotekoa ariko dira finalerako txartelaren bila.
Larunbat arratseko 22:00etan hasita Linddurrenborda sagardotegian eginen den afariaren ondotik jokatuko da final handia.
Bortzirietako bertso eskolatik jakinarazi dutenez, Espidobaita, Arrano eta Linddurrenbordako otorduetan parte hartzeko izena eman behar da bortzibertso@gmail.com helbide elektronikoan edo 618 963011 telefono zenbakian.