Gipuzkoako Lurralde Auzitegiak Igor Portu eta Mattin Sarasola torturatzeagatik lau guardia zibilen aurka ezarritako epaia baliogabetu du Auzitegi Gorenak. Torturaren Aurkako Taldearen arabera, epai honek torturari eta inpunitateari ateak «parez pare» irekitzen dizkio eta jarrera arduragabea erakusten du.
Amaia Izko akusazio partikularreko abokatuak, Portu eta Sarasolaren senideekin batera Iruñean azaroaren 17an emandako prentsaurrekoan epaiaren irakurketa juridikoa egin zuen. Deigarria egin zitzaion Auzitegi Gorenak salaketa aurkeztu zutenak, Igor Portu eta Mattin Sarasola, alegia, ETAko kide izateagatik 2.000 urteko zigorra jaso dutela gogoraraztea eta horregatik euren testigantza zalantzan egon litekeela azpimarratzea. «Bakarrik falta zaio esatea torturak izatea onargarria izan litekeela», kritikatu zuen Izkok. Bertzetik, Izkoren erranetan, Auzitegi Gorenak bere egin du segurtasun indarren hipotesia: hala, Gorenak ondorioztatzen du torturen salaketa faltsuak egiteak ETAren estrategiari erantzuten diola. Izkoren arabera, argudio hori bereziki arriskutsua da faltsutzat jotzen ahal dituelako tortura salaketa guziak. Horren aitzinean, familiaren eta torturak pairatu zituztenen izenean eramandako akusazio partikularrak baliogabetasun errekurtsoa aurkeztuko du, eta 30 egunen buruan, babes helegitea Auzitegi Konstituzionalean. Europako Giza Eskubideen Auzitegira joateko prest da.