Berako kirol eta kultur elkarteentzako diru laguntzak eskatzeko epea zabalik dago Eskaerak azaroaren 30era arte (asteazkena) aurkeztu beharko dira Herriko etxeko bulegoetan. Ez dira onartuko epez kanpo aurkeztutako eskaerak, ezta Kultur etxean, Kiroldegian edo e-postaz aurkeztutakoak ere.
Kirol ekitaldiak
Kirolean bi diru laguntza mota izanen dira: Alde batetik, Kirol praktika (denboraldi luzea duten jarduerak): liga bat dutenak, urte osoan zehar egiten diren mendi irteerak, astero entrenatzen den kirolen bat eta gisakoak. Bertze aldetik daude Kirol ekitaldiak (egun batean egiten direnak).
Kirol praktikari diru laguntza osoaren %80a ematen zaio eta kirol ekitaldiei gainerako %20a. Eskaera guztien artean banatzen dira irizpide batzuk jarraikiz.
Kirol praktikari dagokion diru laguntza onartu eta egun batzuetara egokitutako kopuruaren %50a ematen da, eta urte hondarrean ebaluazio orria entregatzean gainerakoa; hau da, gehienez ere, bertze %50a.
Kirol ekitaldia denean, aldiz, egun bakar batean egiten denez, egiten den egunetik hurrengo 30 egunen barnean entregatu beharko dute ebaluazio orria eta memoria ekonomikoa -hau da, gastuen justifikazioa-; ondotik, ordainduko zaie dagokien diru laguntza, betiere dena ongi justifikatua badago.
Diru laguntzak emateko irizpideen inguruan argibide gehiago nahi izanez gero, Udal Kirol Zerbitzuaren bulegoetan galdetu behar da.
Kultur ekitaldiak
Kultur ekitaldiak egiten diren egunetik hurrengo 30 egunen barnean entregatu beharko dute ebaluazio orria eta memoria ekonomikoa -hau da, gastuen justifikazioa-; ondotik, ordainduko zaie dagokien diru laguntza, betiere dena ongi justifikatua badago.
Diru laguntzak emateko irizpideen inguruan argibide gehiago nahi izanez gero begiratu web orrian dagoen Kultur Batzordeko atala edo galdetu Udaleko Kultur etxean