Bera baserriz baserri liburu berria argitaratu dute Rosa eta Jose Antonio Totono Errandonea anaia-arrebek zortzi auzoetako 135 baserrien eta bertan bizitu direnen 764 argazkiekin. Aurkezpen ekitaldian, egileekin batera, Marisol Taberna alkatea, auzo bakoitzeko hitzaurreak idatzi dituen Juanma Molinero eta Fernando Mikelarena historialaria izan ziren. Alkateak Errandoneatarren lana goraipatu zuen eta beti historia eta egungo ekitaldiak ezagutzeko eta ezagutzera emateko prest daudela gogorarazi zuen. Molinerok ere esker hitzak izan zituen eta «egungo krisiarekin, norbere kabuz eta patrozinatzaile gabe liburuak argitaratzeak ausardia eta herriarekiko maitasun handia» erakusten dituela aipatu zuen. Mikelarenak baserrien historiaren zati bat jakitera eman zuen. Erroldaren arabera 1853an 138 baserri zeuden eta 1646an 67 baserri. Altzateko jaunak urte batzuk lehenago 25 baserri errearazi zituela azaldu zuen: «Bera izanen da Euskal Herriko eta munduko herri bakarra karrika eta plaza bat eskainia diona herrian hainbat hondamendi sortu zituen jauntxo bati». Liburuaren egileek ere hartu zuten hitza. Totonok aipatu zuenez, «lan hau baserritarrek egin dute, beraien etxeetako ateak zabaldu baitizkigute». Eta Rosak aipamen berezia egin zien baserrietako emakumeei: «beraiek baitira zapata eta txokolate kutxetan argazkiak gorde dituztenak». Mikel Zubietak prestatutako ikusentzuteko ederra ere erakutsi zuten. Liburua kiosko eta ohiko dendetan salgai dago.