Bortzirietako Gizarte Zerbitzuen Mankomunitateak eta Nafarroako Berdintasunaren eta Familiaren Institutuak bultzatuta, Kontziliazioaren Astea egiten ari da “Ardurak banatu, elkar maitatu” izenburupean.
Larunbatean “Cuidadores” filma eskaini zen Beran eta zaintzaren etikaren gaiarekin segitzeko, azaroaren 10ean, ortzegun arratsaldeko 18:00etan, Lesakako Koxkonta Bideko erabilera anitzeko udal aretoan, Neus Alberto Meri berdintasun teknikariak solasaldia eskainiko du. Gaur egungo gizartean zaintze lanek garrantzirik ez izatearen arrazoiak aztertuko ditu eta kontzeptu hori ikasteko, elkartasuna adierazteko edo maitasuna erakusteko modua bezala berdefinituko beharko litzakeela adieraziko du. Belaunaldiz belaunaldi estereotipoak nola errepikatzen diren aztertuko du eta nola emakumeek hartzen duten zaindari lana. Zaintza horietan nahiz etxeko lanetan gizasemeek ardurak hartzearen garrantziaz ere ariko da. Solasaldi honetan ere ludoteka zerbitzua eskainiko da.