Gorritz enpresak eginen ditu Herriko Etxea moldatzeko bigarren faseko lanak. Udalak egindako deialdian, bortz enpresek aurkeztu zituzten eskaintzak, eta horien artean, lanak Leitzako enpresari ematea erabaki zuen irailaren 29ko udal plenoan, 519.724,63 eurotan. Marisol Taberna alkateak kontatu digunez, «sotoan artxiboa gordetzeko tokia egokituko da eta langileentzako aldagelak eginen dira. Beheko solairuan, eskuin aldera, bulego batzuk paratuko dira eta eskailera azpian komunak. Lehenbiziko solairuan bulegoak joanen dira: idazkaritza, alkatetza, kontu hartzailearena... Bilera gela ere eginen da. Bigarren solairuak eta ganbarak, azkenik, berdin segituko dute».
Bertzalde, Nafarroako Gobernuaren dirulaguntzarekin sei farola aldatu dira Ricardo Baroja ikastetxearen eta kiroldegi aldeko erreka bazterrean. Kontsumo baxuko argiak paratu dira.