Abian da Bortzirietako Eskuz Binakako Pilota Txapelketaren hamaikagarren edizioa. Urriko lehendabiziko asteburuan hasi ziren lehiak eta azaro bukaera bitarte, nor baino nor ariko dira.
Txapelketa honetan, guztira 46 bikotek eman dute izena eta zortzi kategoriatan jokatuko dituzte partidak: ttikiak edo aurrebenjaminak, umeak edo benjaminak, kimuen edo alebinen A eta B mailak, haurren edo infantilen A eta B mailak eta kadeteen A eta B mailak.
Zazpi pilota elkarte
Nafarroa eta Gipuzkoako zazpi pilota elkartetako ordezkariak dira, gehienak eskualdekoak: Txaruta (Baztan), Biltoki (Igantzi), Gure Txokoa (Bera), Arkupe (Lesaka), Altxata (Etxalar), Oiarpe (Oiartzun) eta Hondarribi.
Partidak urriko eta azaroko ortziral, larunbat eta igandetan jokatuko dituzte Bera, Etxalar, Igantzi eta Lesakako pilotalekuetan eta onenek azaroaren 26an Lesakan eginen den finalerako txartela lortuko dute.