Aitzineko alean eskolako informazioa helarazi genizuen. Pelle-Ttiki haur eskolan, berriz, irailaren 12an lanean hasi ziren hilabete bateko atsedenaldiaren ondotik. Koldobike Gorostiza hezitzailearekin, Haizea Arenas Etxeberria, Helene Alzuri Lujanbio, Asier Mutuberria Pagola, Beñat Iriberri Casquero eta Xabier Leiza Maeztu ttikiek osatu dute momentuz ikasturte hasierako taldea eta urrian Karmele Oiartzabal Iturria hasiko da. Talde ttiki eta polita dela ezin uka. 09:00etatik 13:00 bitarte jolasean gauza berriak ikasten gustura pasatzen dute. Eta horrela hezi eta hazi eginen dira gure haurtxoak!
Gainera, aski xoko koloretsua gelditu da Pelle-Ttiki. Abuztuan, auzolanean margoketa lanak egin dituzte gurasoek. Bertzalde, haur eskolaren proiektuak luzez iraun dezan, hainbat ekimenetan jarraitzen dute gurasoek. Arantza Rock egunean ogitartekoak saldu ziren Pelle-Ttiki haur eskolaren alde. Lerro hauek baliatuz, jarduera honetan zein bertze edozein ekintzetan parte hartu duzuen guziak eskertu nahi ditu Pelle-Ttiki haur eskolak, jasotako laguntzagatik.