Foru Legearen arabera, plan bereziekin Ingurumen ondorioen adierazpena egin behar da eta berriki horixe egin da Harrobiak Irisarrin egin nahi duen turismo eta aisialdiaren gunearen planarekin.
Irisarriko proiektuaren plan berezia hasiera batez otsailaren 23an onetsi zuen Udalak eta apirilaren 1ean Nafarroako Aldizkari Ofizialean argitaratu ondotik, ez zen alegaziorik aurkeztu. Aurreikusitako jardueren artean hauek aipa daitezke: Irisarri Jauregia zaharberritu eta hotel-apartamenturako egokitu; lau eremu sortu ostatu emateko unitate sakabanatuak eraikitzeko (gehienez hogei); abeltzaintzako hiru nabeak egokitu nekazaritza eta abeltzaintza, turismo eta aisialdiko jardueretarako; borda bat egokitu etxebizitza partikularra izateko; kisu-labea egokitu eta aparkalekuetarako eremua moldatu.
Ingurumen Kalitatearen Zerbitzuaren arabera, plan berezia bateragarria da natur ingurunearen kontserbazioarekin, eta Biodibertsitatea Zaintzeko Zerbitzuak ere aldeko txostena emana du. Ingurumenaren eta Uraren zuzendari nagusiak, bere aldetik, Ingurumen ondorioen adierazpena egin du, baina baldintza batzuk bete beharko dira: proiektuaren xehetasun azterlan bat egin beharko da eraikuntzen diseinuek, aparkalekuek, tirolinak eta ur eta elektrizitate hornidurek eta saneamenduak sortzen dituzten ingurumen ukipenak jasoz; interes bereziko zuhaitzak ukitzea ere saihestuko da; lur mugimenduen xehetasunak ere jakinarazi beharko dira; elektrizitatearen hornidurari dagokionez, transformazio zentro berriek eta aireko linea elektrikoaren tarteak dakarren elektrokuzio arriskua saihesteko eta hegaztiak babesteko neurriak kontuan hartuko dira eta zuhaitzak moztu aitzinetik, Oihanak Kudeatzeko Atalari jakinaraziko zaio.