Udako oporraldiaren ondotik, irail hasieran itzuli ziren neska-mutikoak eskolara. Aurten bederatzi dira lehenbiziko aldiz eskolara doazenak, eta guztira 65 ikasle.
Eskolako ordutegitik kanpo horietako aunitzek eta herritar helduagoek ere bertzelako ekintzak eginen dituzte. Urritik aitzinera horretarako aukera eskainiko baita.
Multikirola
Iazko erantzun ona ikusita, eskolatik multikirola antolatu da aurten berriz. Urriko lehenbiziko astean hasiko dira klaseak eta asteazken eta ortziraletan izanen dira, 16:00etatik 17:00etara. Landuko diren ekintzak eskubaloia, uretako kirolak, herri kirolak, atletismoa eta patinaia izanen dira. Hamazazpi neska-mutikok eman dute multikiroletan izena eta Urdi enpresako norbait etorriko da klaseak ematera.
Musika eskola
Musika eskolaren eskaintza ere izanen da, baina lerro hauek idazterakoan ezin izan da xehetasunik bildu.
Kenpo kai, gimnasia, pilates eta batuka
Kenpo Kai Berako Koro Iriartek eskainiko du. Mantenimenduko gimnasiaz, berriz, Ana Larretxea aranztarra arduratuko da eta astelehenetan (20:00-21:00) eta ortzegunetan (18:30-19:30) eskainiko da urriaren 3tik aitzinera.
Pilates eta batuka Etxalarren bizi den Rebeca Aranzadik emanen du. Astelehenetan 18:30etik 19:30era pilates eskainiko du eta asteazkenetan 20:00etatik 21:00etara batuka. Azken hau berrikuntza da aurten.