Lanean segitzen du Elkarrizan boluntarioen taldeak, Bortzirietako Gizarte Zerbitzuen Mankomunitatearen laguntzarekin. Uda honetan, erraterako, hainbat jarduera egin ditu: baliabide mugatuko familietako gaztetxoei ikasketekin lagundu, adinekoei euren etxeetara edo ospitaletara lagundu, zahar etxekoei konpainia egin... Eta ikasturte berriarekin, gaztelaniako klaseei ekinen zaie. Horretarako, Beralandeta uzteko eskatu zaio Udalari eta erretiratuak dauden bi irakaslerekin eskolak emanen dira, astean bi aldiz, irailetik ekainera. Udazkenean sentsibilizazio kanpaina bat ere egitekoak dira, boluntarioak behar dituztelako.