Joan den irailaren 7an, eskualdeko hainbat ikastetxetan bezala, ikasturte berria abiatu zen herriko eskolan. Maixuak irailaren lehenean hasi ziren udako oporraldiaren ondotik, eta joan den astetik, neguko denboraldian sartu da eskola.
Aurten, gainera, zortzi ikaslek eskola haundia estreinatu dute. Batzuk Pelettiki haur eskolatik heldu direnez, beharbada ez dute arrotza izanen eskolako martxa.
Iaz baino unitate bat gehiago du eskolak, Maddalen, Iraide, Beñat, Saioa, Oinatz, Kattin, Ainize eta Oierrek hiru urteko ikasleen taldea osatzen baitute. Eskola barreneko espazioa moldatu behar izan dute, Haur Hezkuntzako gela berri hori izateko.
Guzira, 52 ikasle daude aurtengo ikasturtean. Aitor Elexpuru zuzendari eta irakasle arduretan ariko da; eta gainerako maixuak Ixabel Danboriena eta Juana Larralde bertakoak; Haritz Arriola sunbildarra; Naiara Diez eta Karmentxu Iriarte irundarrak; Igone Elizondo doneztebarra; eta Anartz Miner Astigarragakoa dira. Bertze maixu bat ere bada baina lerro hauek idazterakoan, ez zuten horren informaziorik.
Gainerakoan, lehenbiziko egunetik jantokiko zerbitzua abian da iaz bezala, eta hilabete honetan eskola goizez bakarrik izanen dute.
Eskolako lanak
Ikasturte berria prestatzeko zenbait lan egin dira eskola barruan eta kanpokaldean: patioa margotua dago; irailaren 2an eskolaren desinfektazioa egin zen; biharamunean, Guraso Elkartekoek auzolanean ikastetxea garbitu zuten. Izan ere, eskolako leihoak aldatu dituzte. Horretarako, Udalak leihoak berritzeko lanak Ireki Leihoak enpresari esleitu zizkion, 30.350,78 eurotan, BEZa barne. Udalak 21.975,08 euroko dirulaguntza jaso zuen Nafarroako Gobernutik, lan horiek egiteko. Zein leiho aldatu jakinaraziko dio Udalak enpresari laguntza hori gastatu arte.
Bertzetik, eskolako berogailua berritzeko lanak Kalbiosu enpresari esleitzea erabaki zuen Udalak, 34.136,22 euroan, BEZ-a barne.